談及坎坷的生活,三十七歲的阿靜不禁悲從中來。「我哋兩仔乸啱啱落到嚟佢就已經坐緊監,我哋冇錢交租,被人迫遷,試過喺街度瞓咗幾日,冇錢買飯食,全靠人哋施捨飯盒畀我哋,後來好彩有社工幫,唔使再露宿街頭。」
在內地從事幼稚園工作的阿靜婚後已辭去工作,其夫則耗盡積蓄購入一部的士,在港任職的士司機,應付生計,生活尚算安穩。惟受經濟不景影響,他被迫把的士出售,以致經濟陷困。持雙程證留港照顧孩子的阿靜,月前獲批單程證,由於居港未滿一年,未合資格申請綜援。
探監車費無着落
在社工協助下,他們現租住狹小的板間房,家中的衣服、床鋪、電視機、煮食爐及電飯煲等日用品,大部份是社區中心或街坊轉贈。由於每次往返探望其夫的車費亦要數十元,所以她每月只會偕同兒子前往探望丈夫一次。
「每次去探佢淨係車費都要使幾十蚊,試過有時連食都冇錢,所以我哋都冇去睇佢;為咗慳啲錢,每日我都會晏啲先去買餸,幾蚊就有一大袋菜,可以分幾餐慢慢食。」她無奈地續說:「醫生成日話文仔又瘦又矮,應該食多啲奶粉,但係邊度有錢買,呢幾個月多得人哋送咗兩、三罐畀佢食。」
當記者問及文仔的新年願望時,就讀幼稚園低班的他滿臉稚氣靦腆地表示:「我好想去麥當勞,好想媽咪買超人玩具畀我玩!」