有冇咁準呀！？四川世紀大地震發生前，據講早有預兆，最先發現唔妥嘅並非官方或科研機構，而係四川綿竹市幾十萬隻癩蛤蟆，有人事後孔明穿鑿附會，指呢批癩蛤蟆月初已經隨街跳搵地方匿埋，好似荷李活災難大電影場面。呢種趨吉避凶動物本能唔係癩蛤蟆先有，原來香港都有人早識天機，可惜知都冇用，人類實在太渺小，面對天災根本避無可避。

老友話畀八方知，玄學家楊天命批中四川會發生地震，八方翻查楊師傅幾個月前出版嘅鼠年運程書，楊天命舊年底起咗一支「既濟」「坎卦」。據佢講呢支卦內藏「勾陳官鬼」，象徵今年有屬「土」嘅災劫，佢喺書中預言，中國雲南、四川可能出現地震或爆炸等事故。
另一個師傅麥玲玲，亦批今年天災橫禍特別多，佢本鼠年運程書指今年立春八字有土木相剋之象，所以容易發生山泥傾瀉、倒塌危機，連高空意外都有，總之樣樣嘢都好危。根據佢卜算，今年有機會再發生殺傷力幾強嘅大型地震、海嘯，今年至今未有嚴重海嘯災難，但似乎俾佢批中咗有地震，不過麥師傅喺書中冇好似楊天命咁批中天災地點。
八方翻閱其他運程書，發現其他師傅好似冇「貼」得咁仔細，可能天機不可洩漏啦。楊天命同八方講，佢起到「既濟」呢支卦時都心知不妙，為免引起公眾恐慌，所以盡量平鋪直敍寫出嚟就算，「寫得平淡啲，費事俾人話我妖言惑眾。」其實玄學家事先批中發生地震又如何？最多咪好似楊天命自己咁，今年唔去四川但求避過一劫，當地人始終冇得走，唔通好似做戲咁大遷徙？流離失所一樣咁凄凉。

楊天命噚日話，最大鑊嘅嘢已經發生，相信下半年都唔會再有嚴重天災，而新曆8月8號後各方面都會穩定啲，承佢貴言，八方都希望佢今次開口中。𠵱家災情嚴重，有樣嘢八方唔使占卜問卦都算得準，就係大家一定會團結救災，賑濟內地災民！香港人好有愛心，大陸或其他地方有天災都好樂意施以援手，有錢出錢，有力出力，捐助內地災民，點少得你一份?
mailto:[email protected]