拍AV係一個大話，Chili咁搏都係為咗上位同搵多啲錢。但世事邊有咁如魚得水，Chili由宣佈拍AV至今，約兩個月時間，做過四次酒吧騷及活動，但賺到嘅比預期少好多。

Chili認真地諗咗一諗：「之前所謂嘅五位數job，其實都係得四位數頭，訪問同大家咁講，都係公司叫我咁講，因為唔想俾人壓價，實情最多得三千，至少一千，四次活動加埋一萬蚊都冇。」猶記得Chili嘅公司聲稱Chili會接拍兩部AV，每部收20萬酬勞，出席書展活動時公關更請咗12位保鏢，確實係威係勢(相關新聞﹕ http://bit.ly/2w0ATpu )。Chili坦言嗰刻都好愕然﹕「冇諗過公司會咁做，以我角度，點解請十幾個保鏢，都唔願意花錢俾我買衫同化妝呢？！」

Chili透露與公司原本仲有兩年合約，但因為經常被拖糧，及覺得有欠尊重，雙方鬧咗一場大交後，Chili就收到一個終止合作嘅短訊，佢話﹕「我都好感謝佢哋無條件同我解約，俾機會我回復自由身。(有冇見過幕後老闆？)連我都唔知係邊個，我以前間公司突然話幫我簽咗畀另一間公司，但張約又唔係我簽嘅。」Chili表示簽一間不知名嘅公司都係無可奈何，佢都好坦白咁話：「我諗我都冇資格入大公司。」

大話冚大話，Chili最真嘅，應該都係屋企人；爸爸七年前過身，並有一位患有腎病需要長期接受治療嘅媽媽，一家四口曾經攞過綜援。Chili表示屋企人最初聽到佢拍AV，即時鬧到翻天覆地，佢話﹕「鬧呀，但我同佢哋講係一條橋，唔係真係拍。(自己接唔接受到？)我都過唔到自己嗰關，太激，我唔鍾意喺人面前俾晒所有嘢人睇。(三級片？)我唔會諗呢啲，我最希望做打女，之前減咗14磅，想減多15磅，會繼續努力。」