今日智叔廖啟智同盧海鵬、陳雅倫及陳嘉恒喺有線電視擔任嘉賓評判，即場向應徵藝員人仕考演技同急材，應徵者有雪梨女兒徐穎堃、前TVB藝員兼現任HKTV旗下藝人丁樂鍶（腸粉）等，腸粉坦言係經理人公司叫佢面試，事前完全唔知係大型招募活動，坦言過程想喊，感覺似受騙。原來佢經理人只係同佢講上節目做casting，腸粉都係去到先知原來係咁，難怪嚇一跳驚驚啦；智叔就話事後先知自己測試應徵者中，其中一位係雪梨個女。

面對仔女踏入青春期階段，父母難免會擔心仔女言行及心智發展，早前廖啟智長子更成為封面主角，智叔同太太陳敏兒事後受訪，都坦言對長子有所忽略。今日智叔講番長子早前單新聞，佢話：「係一個機會令大家了解更透切，當然大家情緒總有波動，不過佢返到屋企就同我講唔好意思，拖埋你落水，而我都話若果我唔係做呢行咪唔會咁。」

至於同場嘅陳雅倫，被問到喺張美妮婚宴上，被影到同李思捷態度親密，佢再次澄清同李思捷冇戀情，當日純粹朋友傾談，冇親密動作。