正在為演唱會努力綵排嘅Shine，噚晚喺土瓜灣為演唱會紀念品影相，分別有T Shirt、 Tote Bag，同埋佢哋有份設計包裝嘅「Shine Mask」。追問到點解要推出面膜？天佑表示：「因為有人話我哋個樣冇老過，於是我哋商量後就決定不如整個Mask畀大家，希望大家敷完後塊面都可以好Shine。」佢哋話面膜係來自美國，而包裝就以紅館四面台嘅設計，仲話限量三百套。

今次兩場演唱會嘅嘉賓已經定好，但兩人就繼續賣關子，淨係透露兩場總共會有四個唔同嘅音樂單位，全部都係佢哋好欣賞。問道天佑太太會唔會嚟捧場？佢話：「老婆今次會兩場都喺台前睇，因為上次佢全程都喺後台。」

為咗今次演唱會，又南同天佑都好努力咁健身Keep Fit，兩個都練出一身肌肉。o依家又南已經手瓜起展，天佑亦都擁有六舊腹肌，昔日嘅半熟少年而家已經變為兩位肌肉男，咁到時會唔會將肌肉大騷特騷，又南笑笑口話：「睇情況啦，都會有啲嘅。」天佑就話：「老婆見到我操得咁辛苦，都叫我快啲騷畀人睇。」

精選娛聞，喺晒《娛果》
http://fb.com/appledailyent