薛家燕噚晚喺銅鑼灣舉行生日派對，慶祝佢68歲生日，家燕姐三個仔女，包括即將結婚嘅囝囝Jackson仲仲帶埋未婚妻同未來親家奶奶及公公婆婆一齊到賀，另外黎小田、湯寶如、唐文龍、楊思琦同陳浩民夫婦等都有出席，生日會上家燕姐連同仔女及親家一齊影大合照兼切蛋糕。

家燕姐接受訪問時表示：「好高興親家由英國特登嚟香港賀我，呢幾日都要同佢哋食飯聚吓。」講到生日願望，家燕姐話：「好感恩今日係雙喜臨門，除咗係我生日，六月我就做奶奶，今日有好多朋友嚟到，包括我嘅學生，大家都好錫我好俾面。」

講到囝囝嘅婚事，佢話已經準備得七七八八，而工作上都有好多嘢忙：「五月母親節時候會推出家燕媽媽嘅朱古力，而且同步入咗紙申請紅館演出，慶祝我入行60年，好希望可以今年內如期開到。」

另外，嚟到賀嘅陳浩民夫婦就話近來都忙湊細路，陳浩民表示：「屋企幾個細路每星期佢哋學校都有親子旅行，我同太太就要輪流陪佢哋出去，又有運動會，今時今日啲學校唔同以前，o依家有好多親子活動要我哋一齊去，雖然係忙咗好多，但有機會可以一齊玩下，認識多啲都好嘅。」

精選娛聞，喺晒《娛果》
http://fb.com/appledailyent