韓國天團BIGBANG近年撈到盤滿缽滿，更加係所屬公司YG事務所嘅得力愛將，相反，出道時打正旗號話係「女版BIGBANG」嘅2NE1就冇咁好彩，近年傳出成員不和、涉毒、整容等負面是非之外，曝光率愈來愈少，加上公司又只係力捧隊長CL到外國發展，令組合名存實亡。

而多次傳出退團消息嘅成員敏智，唔知係唔係深知組合名存實亡，近日就搵定條後路畀自己，開咗間跳舞館，噚日喺首爾新亭洞舉行開館典禮，敏智自己都有喺Instagram宣傳下咁O架。

不過，隊友開跳舞館，其他三位成員冇到場祝賀都唔止，就連喺Instagram講句恭喜說話都冇，雖然敏智同Sandara早兩日有孖住去撐師弟iKON場，不過Sandara噚日都冇咩表示喎！做到咁，難怪會傳出不和新聞。