前晚西環夜宴，成班建制派去茶敍，實質就係「查罪」，所以雖然西環主任張曉明冇當面訓斥，仲不斷講好話，但八方聽聞在座建制派議員都好沉重，冇人敢當真係「慶功」騎騎笑，至於有投票嘅自由黨，有與會嘅人同八方講，佢哋今次真係做「西環花生友」，因為佢哋真係有得食花生！

逐個發言似落選謝罪

話說田少唔得閒去西環，就由自由黨主席鍾國斌帶隊，雖然建制派唔少人轟自由黨冇跟大隊走人，連累佢哋做罪人，但今次西環算畀面，茶敍張主家席都預咗自由黨，鍾國斌同方剛可以坐主家席，只係唔知同坐一枱嘅葉劉、林健鋒見到佢哋，條氣會唔會頂住？
有在場人士話，因為今次係茶敍唔係晚飯，枱面有唔少嘢食，除咗有點心，仲有花生、腰果等等，有人話成枱花生，今次自由黨真係可以做花生友，食住花生等睇戲！但聽聞在席其他議員冇乜人食小食，可能茶敍咁夜開，個個食晒飯，再加上咁嘅場合，邊個有心機食？
唔食嘢，但話明係「查罪」，又點可以唔講嘢？所以現場有一個咪，議員要逐個行出去發言，民建聯曾鈺成、譚耀宗、葉國謙和經民聯林健鋒逐個出去發言道歉，台下聽完就拍手鼓勵。八方一聽，乜咁似人哋選舉輸咗，候選人喊晒上台，道歉同多謝支持者咁嘅？

李八方
mailto:[email protected]