有「扮嘢秋」之稱嘅秋官鄭少秋，今晚係佢入行50週年演唱會頭場又點少得扮嘢，秋官一時扮Micheal Jackson(MJ)，一時又唱佢嘅名曲《香港料理》。

之後秋官講到佢扮嘢嘅歷史：「畀人叫『扮嘢秋』嘅時候係扮澤田研二，最近少咗扮嘢，時代唔同咗，o依家啲人扮政治人物，佢哋扮嘢仲叻過我，都係做返自己啦！」之後秋官就唱返大俠劇集嘅主題曲。

唱完一輪大俠劇集曲之後，周慧敏（Vivian）就升上舞台，秋官仲大叫Vivian做「女神」，而Vivian就話自己只係「慳妹」，佢哋仲講到當年拍《大時代》嘅事，仲話當年拍呢套劇時竟然冇對手戲，Vivian仲大爆當年拍劇時秋官有好多人跟出跟入：「放心唔係話你啲咩嘢！大家跟你學嘢！」秋官就話：「係呀我太太今日喺度！」之後佢哋仲合唱《愛在心內暖》。

之後秋官到後台換衫，由Vivian唱出《最愛》撐場，之後唱完後轉身打算入後台，不過此時升降台突然向下降一下，之Vivian反應得及向前踏咗一下有驚無險，佢再向觀眾道別再離開。