查實田少咁緊張,高調申明無放棄ABC,都係擔心自由黨若離棄民意,唔同反對梁振英連任嘅六成市民同一陣線,就會同其他建制派冇分別,凡事阿爺話乜都支持,「一吹雞就歸隊,咁咪變咗經民聯?」
田少越講越勞氣,指張宇人稱自由黨從未高舉ABC旗幟,但自己參選新東時,對方都有嚟為佢站台拉票喎,強調自由黨四百幾人係社會嘅縮影,若逾六成人反對CY連任,作為政黨都要注重,「我係對事唔係對人,我係代表市民,所以繼續ABC」,指自由黨若然放棄此路線,「我相信好多人會退黨」,「社會或者對我哋好失望」。
咁張宇人點解唔高舉ABC旗幟?田少估計,對方想入行會喎,仲話張宇人一直唔多理黨務、黨內認受性唔算高,唔代表自由黨,如果真係入行會,請佢退任主席,似乎真係要同張宇人開戰。唔知早前回應過,話政府冇搵過佢入行會嘅張宇人,如何接田少呢一招?
李八方
mailto:
[email protected]