韓國馬舞大叔PSY今日對位於漢南洞物業嘅租戶進行強制搬遷，不過遭租客反抗，雙方更發生衝突。

房地產方面透露，PSY一方今日向租戶進行強制搬遷，不過一班租客就拒絕搬走，仲舉哂牌表示不滿。而於進行強制搬遷過程中，有抗議人士跟PSY一方發生衝突，有抗議人士跌倒同被警察帶走。之後租客召開記者會譴責是次強制搬遷行動，而強制搬遷亦因而中斷。

據知，PSY於2012年購入該物業，當時物業有一間經營中嘅咖啡室，而咖啡室店主跟前業主嘅租約有效期係去到2013年12月31日，不過租客於約滿時就拒絕搬出，PSY於是向法院提出強制搬遷申請。

另外，PSY今日參加於東大門舉辦嘅活動時，透露新曲創作進度，表示：「目前已經完成所有歌嘅創作，依家正進行編舞。作為演唱《江南Style》嘅歌手，佢帶俾我好大嘅成功，但作為創作舞蹈嘅人嚟講就係一種痛苦，因為新作品要比佢更加優秀，要同佢唔同。舞蹈同MV跟歌曲一樣重要，依家正進行下一階段嘅創作。」