當年今日
關於我們

地產多聲道:
經紀落嘴頭助買家得心頭好

蘋果日報 2002/08/09 00:00


現時樓市係買家天下,但有買家肯高於市價買樓,背後有好多特別原因。鰂魚涌太古城最近錄得高市價成交,涉資近一千萬,原因係買家要買相連單位。
世紀21安居樂經理盧志安向蘭西透露,買家指明要買太古城向海單位,面積又要有二千呎;太古城最大單位只得千二方呎,要買兩個打通至得。查過公司嘅盤口,發現海景花園美菊閣高層B室同C室係相連,B室放售,C室放租,所以佢哋不斷游說C室單位業主轉租為售,最後出到四百五十萬,業主先首肯,比市價高逾10%;至於相連嘅B室,就以五百三十三萬成交,高市價8%。
聽講買家住開半山區千幾呎單位,換得樓自然要大啲,所以肯畀高啲價向兩個業主買入相連單位。
盧志安話,呢單買賣前後傾咗個半月,佢哋公司都係年幾至做到一單呢啲相連單位成交。
而市場上太古城嘅相連單位放盤唔多,向海嘅就只有一個低層2400方呎相連單位,但叫價就要成1200萬,即5000蚊呎,買家要先講掂兩個業主。

加州花園一枝獨秀
上個月樓市淡靜,但元朗加州花園就買賣活躍,一個月有十七宗成交,比6月多一倍,中原地產加州錦綉區域經理胡麗君話,佢哋分行攞到7成市場佔有率,營業額有一百二十六萬,平均每個代理有5萬蚊收入,聽到都令人羨慕。該行嘅周鳳儀就個人做咗4間屋,其中兩間係新地嘅一手物業,連埋啲租盤,佣金收入有三十一萬幾,佢自己就估計收到八萬幾。
胡麗君講,原來有唔少買家,都鍾意買一手單位,所以新地放售嘅加州花園單位,好快就有承接。不過本月由於有馬灣珀麗灣開售,所以生意都受到影響,暫只有一宗加州花園成交。
講開珀麗灣,中記黃澤文話因為做到五個海天壹色單位同三十對相連單位,所以噚晚喺葵芳新都會廣場擺慶功宴,而下一餐就係請啲做到數嘅代理。至於佢嘅對手美聯,噚日就喺報章出咗個新廣告,由公司嘅珀麗灣統帥營業董事黎偉強上陣,增強年輕化形象。
噚日新地用陽光巴士喺中環接載各大代理行高層入珀麗灣睇樓,本來好。
內地樓搞展覽緊貼潮流
內地樓盤來港展銷情況普遍,每個禮拜喺酒店都有唔少展銷會,深圳藍籌公司萬科集團,位於福田嘅金域藍灣,明日會在港發售首批單位,佢哋話以「自然純海景生活體驗」做主題,聽講現場會有圖片展示樓盤嘅海景賣點,同時又有香薰及小食等。今次在港推售二十八伙,係中大型單位,呎價708人民幣起,港客有3%折扣。

海堤搞嘉年華引人睇樓
東涌海堤灣畔上個禮拜六開售,兩日賣出二百幾個單位,成績唔算好,發展商明日會喺東涌東薈城舉行「環球藝穗嘉年華」,等市民可以喺吃喝玩樂之餘,順便參觀示範單位,感受吓海堤灣畔帶嚟嘅全新生活體驗。
不過,發展商之一嘅太古地產,呢幾個禮拜都喺東薈城搞緊「夏日飛躍東薈城」活動,到時場面肯定更加墟冚,但若果啲市民掛住玩,冇時間睇示範單位就弊嘞。同期馬灣珀麗灣開放現樓示範單位,兩大樓盤搶客戰結果會點?都唔使講嘞。

東方廣場未雨綢繆
購物有積分優惠嘅宣傳手法,喺香港好普遍,內地都趕上潮流。長實北京東方廣場嘅「東方新天地」商場,噚日就成立「東方新天地會」,引進內地首台應用於商場嘅自動優惠兌換機,會員可以憑「東方新天地卡」,在「自選優惠」同時,享有「循環積分」優惠。
原來顧客先在「東方新天地」購物消費,至可以申請入會,攞住張卡購物就可以將消費金額轉為積分,再用積分在兌換機上揀自己鍾意嘅優惠券,包括折扣券、現金券。
北京未來會有好多大型商場落成,個個都係巨無霸,港商見情況不妙,一早就做定工夫,等市民養成購物習慣,日後都唔會咁易幫趁其他商場。誘之以利呢招相信一定掂。
蘭西
電郵地址:[email protected]