長實（001）喺大年初七「人日」舉行股東特別大會，一班記者見到超人當然好有禮貌咁同佢拜年，講句恭喜發財喇。超人亦好識做，甫行入酒店大堂，就笑住咁主動行埋去記者區打招呼，仲狀似想從西裝口袋裏拎利是出嚟大派，點知拎拎下，佢就被助手帶走咗，超人利是隨之而消失了。
超人噚日行埋記者區劈頭就話「Just to say hello」然後就一路伸手入西裝袋似係拎利是，一邊問現場記者「你哋都唔敢攞㗎啦，得唔得㗎？」似係想大派利是。
就喺超人隻手仲停留喺口袋嘅時候，有記者就唔放過提問機會，問超人點解旗下新盤冇窗台咁益街坊，又問佢點睇預算案，佢助手見唔對路，即刻走埋去同佢耳語幾句，超人跟手就拋低一句「我唔講嘢啦，Just to say hello ，同你哋」就走去準備開股東會，派利是呢件事當然冇發生到喇。