第29屆台灣金曲獎今晚舉行頒獎典禮。

蕭敬騰今晚為金曲獎做主持，喺頒發最佳男女歌手之前，佢就先喺台下同一眾提名歌手傾偈，當去到同陳奕迅（Eason）嘅時候，蕭敬騰笑言：「自從上次在頒獎禮之類的地方見到你，跟你交換了電話後，就再也沒有聯絡了。」之後蕭敬騰就大讚Eason係永遠嘅天王，而Eason亦賣口乖大讚對方嘅主持表現，兩人更互拜對方。

當蕭敬騰去到好友兼Eason今屆勁敵林俊傑時，兩人擁抱多次，林俊傑話係因為想沾下蕭敬騰嘅運氣，點知蕭敬騰話：「我最近運氣有點差。」搞到林俊傑一面無奈，惹來全場大笑。

嚟到頒獎環節，今屆最佳女歌手由參加《台灣星光大道》歌唱比賽出道嘅徐佳瑩打敗張惠妹獲得，佢喺台上除咗多謝大家嘅支持之外，佢話：「我之前在看的時候覺得大家拖著手很假，可是剛剛我在下面拉著妹姐的手的時候，才知道那個感覺，那是一種『誰得獎都可以』的感覺。」另外佢仲特別多謝導演男友比爾賈，男友喺台下即刻做出愛心手勢，閃爆全場。

而頒發最佳國語男歌手獎時，台下全部提名歌手一齊手拖住手，最終由陳奕迅喺頒獎嘉賓方大同手中奪得，陳奕迅喺台上先係望住個獎一陣，之後拎出手機影相，之後佢一路傻笑，抬頭望到大會嘅讀白機佢見到「你的致詞時間已結束」，所以佢一路道歉一路講感言：「台灣的朋友一直對陳奕迅有非常多的厚愛，我一直都好感恩，我最應該做的事情是，在舞台上很專業的唱歌給大家聽，我知道我很久沒有開演唱會了，不好意思讓大家等，我在想我應該要做一個比以前更加好的演唱會。」之後陳奕迅諗咗一陣，唱出《披風》嘅副歌代替感想，向台下三鞠躬並大叫：「謝謝！」

而壓軸嘅最佳國語專輯獎由徐佳瑩嘅《心裡學》獲得，宣佈得獎之後，徐佳瑩喺台下驚訝到合唔埋口，坐喺身邊嘅張惠妹立即送上擁抱，上台後徐佳瑩先向評審三鞠躬至意，徐佳瑩話：「我覺得真的很像一場夢，因為跟我一樣入圍的歌手們，都太優秀太利害了。」落台之後嘅徐佳瑩更同男友比爾賈深情擁吻。

而年度最佳專輯獎由陳奕迅嘅《Cmon'in～》獲得，Eason話啱啱唔記得多謝佢嘅製作人Jerald，佢形容今次係以冇包袱嘅心態嚟參加聚會，仲話好抱歉拎咗咁多大獎，向觀眾再三承諾會嚟台灣開辦演唱會。

精選娛聞，喺晒《娛果》
http://fb.com/appledailyent