當年今日
關於我們

沙膽虹手記:歪理又嚟 - 沙膽虹

蘋果日報 2012/01/03 00:00


沙膽虹早前寫咗篇文,反駁環保觸覺建議向在港置業的國內人士和以公司名義置業者徵收一成印花稅,最近收到環保觸覺主席譚凱邦嘅回應,話附上整份新聞稿和圖表數據,讓沙膽虹全面瞭解佢嘅論點云云。
沙膽虹心諗,上次篇文有邊段令佢覺得唔瞭解佢嘅觀點?睇完封信,論點陳腔濫調之餘,歪理呼之欲出,結論更令人髮指!
樓價主要取決於供求關係。佢話,以發展岩洞和填海來增加樓宇供應並唔可取,會破壞環境,所以惟有抑壓大陸人在港買樓;又話信和新盤「御金.國峯」過萬元一呎,完全脫離一般置業者能力;香港人若連買一個可負擔單位的機會都冇,政府就應干預;又話佢有很多朋友,包括社工教師等中產人士,剛結婚卻置業無望,所以希望沙膽虹認同「香港樓只應賣給香港人」嘅結論。
大佬呀,香港人點樣連買一個可負擔嘅單位都冇呀?負擔唔起一萬元一呎的,可以買五、六千元一呎的舊大型屋苑,好似九龍嘅美孚新邨、港島區香港仔中心等;再買唔起而又好想做業主的,三千多元一呎又唔太遠的居屋都唔少啫,唔係一入場就要住萬元一呎豪宅吧!如果連居屋都買唔起的,亦可忍耐一下存多點錢,等樓價大跌至可以負擔時才入市都得啫!呢個世界邊有人話80後嘅社工、教師、新婚人士一定可以買得起樓?
從過往經驗,樓市每十年八年就有一個循環,只要肯耐心存錢等機會,就一定可以買得到!
文:沙膽虹