因為社會氣氛關係，政府宣佈今年取消每年農曆年宵市場都大受市民歡迎的乾貨攤位，結果以往人潮擠逼得水洩不通的畫面不復見，剩下只有濕貨和熟食檔檔主大呻生意大不如前。然而，靈活變通和逆境自強皆是我們香港人的精神，既然政府不舉辦，索性由民間自發組織，於是今年各區都有類似的年宵乾貨市集，而且全部都大排長龍，好像日前組合ERROR接受《蘋果》邀請，到位於荔枝角、D2 Place舉辦的香城年宵市集，就擠滿年輕男女，好不熱鬧。

ERROR的四位成員梁業（肥仔）、何啟華（Dee）、郭嘉駿（193）和吳保錡甫現身市集，即被不少市民認出並索合照，同時還發現以往跟他們一同參加《全民造星》的舊戰友小魚在市集內兼職，四人即表示：「你哋睇吓，參加完《造星》後，而家要做保安。」然後又問小魚：「畀你揀多次，你會參加《造星》定嚟做保安？」小魚亦抵死地答：「梗係嚟做保安啦！」

四人在市集內周圍行，大多是「搞搞震冇幫襯」，先後到訪賣創意物品、樂器和惡搞閃卡的攤檔，雖然冇幫襯，但檔主們都相當歡迎，樂器檔主更大方借出樂器讓他們唱一曲賀年歌，引來不少年輕人圍觀，場面搞笑。唱完歌四人又走到市集另一邊，正值有YouTuber Kitling和Gordon駐場跟大家影相，肥仔等人見人龍太長，居然厚顏地開口問隊頭人士可否讓他們打尖，難得竟沒人反對，最後成功合照。

玩完市集，四人本想到天台呼吸新鮮空氣，但又發現原來有一個音樂表演空間，放滿樂器但未有演出者，保錡他們即表演癮大起。旁邊有一賣飲品的攤檔，主理人是同樣參加過《造星》的Jason和曾演出《淪落人》飾演黃秋生的囝囝黃定謙，最後Jason更捱義氣替ERROR彈結他獻唱一曲《我們不碎》給現場的朋友助慶。

提到新年願望，肥仔即笑言：「希望新一年公司會畀多啲Budget我哋啦。」保錡即接口：「係呀，我哋好慘㗎！樓又冇錢又冇。」阿Dee則說除了賺錢外，亦希望大家身體健康：「因為我哋嘅成員193已經確診咗患上肺炎。」旁邊的193即說：「邊有肺炎呀，我喉嚨痛咋。」

講到正期待經理人花姐派利是，問到可會到花姐家拜年？保錡說：「應該唔會啦，花姐有個習慣，佢唔鍾意人哋用佢屋企廁所，所以如果我哋加埋MIRROR 16個人去到佢屋企，都冇得用廁所，點算？」

採訪：曹家誠
攝影：沈健程
場地提供：D2 Place

-----------------------------
想知今年愛情事業健康運勢？
十二星座運程指南點擊即睇！
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇