金手指:滙豐搵人接火棒 - 孫柏文

蘋果日報 2007/02/16 00:00


上個禮拜四,滙豐出處女盈利警告,因為放咗好多債畀啲唔應該置業嘅花旗國人,去買啲唔值嘅樓。現在,樓價下跌,按揭出現斷供潮,所以滙豐手上嘅按揭,就出現好多壞賬。
喺特區,銀行放債畀人去買樓,之後就會每個月等債仔還錢,因為風險要自己承擔,所以風險控制會打醒十二分精神。而滙豐喺花旗國嘅按揭業務,有啲都係咁做。不過,要自己放債畀人,需要龐大嘅銷售網絡,就算請人都要一段時間。滙豐為咗盡快可以放債畀人做按揭,得到按揭業務回報,就向啲花旗國「樓市叠碼仔」(按揭中介人)去買佢哋已經做咗嘅按揭番嚟。
不如執笠走佬
原理就係咁樣,首先呢啲「叠碼仔」會放債畀人做按揭,跟住滙豐就會幫借咗錢嘅人還款畀啲「叠碼仔」。之後借咗錢嘅人每個月還款,就會畀滙豐而唔係畀原先放債嘅「叠碼仔」。不過,問題就係呢班原先放債嘅「叠碼仔」,雖然知道自己最終唔會承擔風險,不過就係原先計算借錢人還款能力嘅單位,所以根本就冇誘因準確地計算。
當然,滙豐唔係儍仔,買呢啲按揭番嚟嘅時候,就喺交易當中,包括隨時可以將按揭賣番畀啲「叠碼仔」嘅權利。大家可能會問:「咁如果呢啲按揭出事,滙豐賣番畀佢哋咪得囉?」我反問大家:「如果你係啲叠碼仔,知道因為樓市爆煲所以新造按揭減少,不過有好多舊按揭火棒要接,你會點?」冇錯!現在花旗國按揭中介公司已經出現倒閉潮,原因就係如果要接火棒,不如執笠走佬仲好。
最後,滙豐如果想賣走呢啲按揭,可能最後就係要賣畀啲散戶,孫柏文今日已經幫滙豐準備咗啲宣傳單張,大家睇完有冇想買嘅衝動?
金手指網誌: http://phatdat.blogspot.com