祖雲達斯前鋒保羅戴巴拿近期炙手可熱，今季各項賽事為祖記上陣8場射入咗12球，有傳曼聯都準備用1.55億鎊簽佢返嚟，不過佢位身型fit爆嘅model新女友Ginevra Sozzi就話，第一次遇到戴巴拿嘅時候根本唔知佢係乜水！

阿根廷鋒將戴巴拿同Ginevra Sozzi係喺西班牙一個小島遇到之後開始約會，戴巴拿亦因為咁而同前女友Antonella Cavalieri分開。但如果諗住Ginevra Sozzi因為戴巴拿嘅名氣而同佢一齊，咁你就錯喇。

據報道，Ginevra Sozzi對意大利同西班牙傳媒都係話︰「當我遇到保羅嘅時候，我根本唔知佢係邊個。之後佢傳短訊畀我flirt我，我有回應佢因為佢話同女友嘅危機已經存咗好耐。」英國《太陽報》話今次係戴巴拿或者Ginevra Sozzi第一次公開講佢哋嘅戀情，不過佢哋喺各自嘅社交網頁都冇post過任合照。