唔好以為八方齋噏,有人證㗎。西貢區議員柯耀林辦事處職員噚日同八方講,23同盟喺筲箕灣同西貢擺街站,都係一邊收集簽名、一邊派抗疫物資,街站附近甚至有警隊衝鋒車戒備,在場又有唔少大漢保護街站,當佢哋想舉機拍攝就會被阻擋,而現場有唔少公公婆婆排隊拎禮物,街站義工只係向排隊人士講簽個名就可以拎抗疫物資,但就冇特別講解任何23條立法相關事宜。
據柯耀林辦事處職員所得市民報料圖片所見,何已完都有出動到北角區收集簽名,但同盟一邊派防疫物資,何已完同身邊嘅大波Man石房有就一邊冇戴口罩咁同街坊交流。除此之外,柯耀林喺facebook分享咗大埔墟情況,見到早前喺微博呼籲「全國全民聯署」嘅光頭警長劉澤基亦現身,仲有人同佢合照。其實成個活動都唔知有幾多市民知簽名同23條有關,但又正如好多網民話齋,建制派一向都係呃呃騙騙,何況係何已完呢?
李八方