早前有傳民協前立法會議員馮檢基有意退出民協，並且再度參與選舉。馮檢基噚日獲民主黨前主席劉慧卿邀請出席電台節目，阿基之前俾傳媒問退黨再參選，都係扭扭擰擰唔正面答，不過佢太低估卿姐，以為又可以用答咗等於冇答耍走卿姐，點知激到卿姐即時爆seed，對住阿基差不多由頭鬧到尾！卿姐第一條問條已經單刀直入，問阿基點解10日前臨時取消疑似宣佈退黨嘅記者會，阿基已經耍卿姐，到卿姐再追問佢係唔係退黨，阿基仲答自己仲係民協中常委，又推說係傳聞唔答，聽見阿基左推右推，卿姐即時火都嚟：「咩叫點答箒，唔係咪唔係囉！」之後卿姐又追問阿基係唔係有機會退黨，阿基又係唔正面答，話每個人都有機會入有機會退，卿姐又忍唔住寸佢：「唓，你唔好問我係唔係有機會退民主黨？」

「你好兒戲囉！」

阿基唯一願意講多兩句嘅就係佢本新書，大爆書中會講過去多年政壇故事，書入面又提到去年九西補選，佢被迫退出唔做Plan B，民主派同本土派開會唔叫佢，佢由傳媒口中知道後感到好失望，呢個時候卿姐又按捺不住爆佢：「你又唔係唔識其他黨派，你幾簡單打個電話又好，WhatsApp又好，係咪咁呀？咁你都唔去問，我覺得你好兒戲囉！」當講到阿基係唔係永續參選，阿基就話「𠵱家唔考慮」，卿姐又再次火滾：「𠵱家唔考慮？乜你講到咁化學㗎，一係就唔考慮喇，咩叫『𠵱家唔考慮』，你𠵱家整本書，但係本書下個禮拜就整完，即係你下個禮拜就考慮喎？」