藝人小S(徐熙娣)間唔中語出驚人，最近天氣轉涼，又係女士啲厚褸出動嘅時間，由於唔係成日着，好多女士啲褸都係着足幾年都唔換，小S都唔例外，佢噚日喺網上分享自己着咗超過廿年嘅毛毛外套，點知佢就抱怨有親友叫佢唔「不要再穿那件狗毛外套了」，小S拍片扮嬲，對呢件老外套愛不釋手，小S喺片中話：「Why？狗毛外套到底哪裡得罪你們了？」佢仲留言：「我就是要穿狗毛外套forever！少囉嗦！」網民都笑呢件外套啲毛毛係捲毛，笑言係唔係貴婦狗。

冇諗過因為呢一句，即引起愛犬網民議論，真係有網民以為小S着嘅係「真的狗毛大衣」，啲愛護動物嘅網民轟小S，洗版式留言「因為是狗狗的毛啊，太殘忍」、「保護動物，拒絕一切動物製品」。

有啲網民代小S解釋認為外套並非狗毛所造，只係啲毛毛比較舊，摸上去啲質地似，小S先咁講，件事嘈足半日，噚晚小S再度自拍影片回應：「我真的不敢相信，我說這個狗毛外套之後，居然很多人真的以為這是真實的狗毛做的，I can't believe！怎麼可能？」佢又喺facebook寫道：「這不是真的狗做的！！！！！！！！Are you crazy？」有啲fans見小S嬲嬲豬，就喺小S嘅facebook留言安慰「你很龜毛，不就是烏龜做的烏龜有毛」、「不要認真……狗毛外套只是形容詞～我們都知道」。

更多娛聞，喺晒《娛果》
http://fb.com/appledailyent