林德信今日喺西營盤孫中山公園籃球場，拍攝代言能量飲品水動樂廣告，佢身穿便服同一班熱愛運動新一代走籃 ，烈日當空之下見到Alex跑到身水身汗，Alex笑言：今日已經換咗三件衫，上面就濕曬，下面未濕哂。」廣告除咗打波場面外，Alex另一幕要赤膊上身騷肌肉， 為咗拍攝，佢專登操fit一個月，仲忍口節食達至最佳效果，但大家期待嘅畫面仍未公開。

Alex喺英國讀高中曾經加入籃球隊四年，可惜當時讀男校，未能吸引女球迷。Alex透露細個時候好鍾意打波，大過就好難約齊人，o依家會跟爸爸去打高爾夫球，不過往往時間太早，自己跟唔上。至於點解要着住便服打波，Alex指廣告橋段想帶出大家任何時候都可以做運動訊息。

Alex都算多緋聞，佢話自己暫時冇拍拖，亦都唔想咁認真拍拖，難道從來拍拖都唔認真而係拍散拖？Alex話：「唔使咁認真，屋企人教我，我又唔急住要結婚，自己有另一個目標 ，做好自己嘅工作，o依家對演戲好有信心，想繼續發展。」咁講法，緋聞女友松岡李那點算好？

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。