當年今日
關於我們

【異動空間】貿戰變糧食危機? - 魏力

蘋果日報 2019/06/03 02:20

異動空間印度日圓魏力黃金美債比特幣貿易順差糧食危機

特朗普四圍撩交打,跟阿爺反枱之後,又拎鄰國墨西哥祭旗,圍牆起唔成,就用關稅伺候,關稅就由5%起逐月加,去到10月就25%。消息一出,盟友日本即時誤中副「車」,皆因出口往美國的日產、本田等汽車均在墨國生產,可說躺着中槍。由此可見,老特為展現「美國強大」,為明年連任鋪路,基本上敵友不分,阻我者死咁款。

執筆時佢又再出手,取消印度關稅優惠國的地位,原因又係一句「貿易不公平」,真係佢講晒。但換個角度諗,當所有國家都抽緊美國水,在貿易上佔便宜(貿易順差),其實只因美國人天生購物狂,先需要進口咁多貨品,搞到自己周身債。據統計,2018年美國總儲蓄率只有約2.5%,為發達國家中最低;近8成美國打工仔是「月光族」,近7成美國人銀行戶口存款更少於1,000美元。睇到呢堆數字,貿赤係咪合情合理?

老特不斷強調「加關稅=坐係度收錢」,實情只係向美國消費者抽稅,最後因為物價太貴、買唔起,令貿易量大幅萎縮,最終導致貿易全球化「拆倉」,經濟一齊攬炒。投資前景太不明朗,資金無處可去,只能投向「避險三寶」──美債、日圓、黃金,再加些少比特幣。此外,近日投資者開始賭貿戰會演變成糧食危機,帶動相關ETF谷底反彈,值得繼續觀察。

魏力
http://fb.com/2012jason
本欄逢周一、五刊出