胡鴻鈞今日到樂富出席籃球活動，仲邀請咗一班來自佢母校拔萃書院嘅藍球隊球員一齊同胡鴻鈞示範射籃。佢話自己以前係打得分後衛：「因為身型唔夠人撞，所以教練就叫我喺外圍射波。」

現場所見胡鴻鈞都打得有板有眼，佢話：「自己都有一、兩個月冇打過波，因為呢段時間連續開緊兩套劇，希望八月中拍完，可以投入番音樂工作。」佢話計劃今年內可以出到碟，講到周柏豪加盟星夢娛樂(新聞連結： http://bit.ly/2uxuEru )，佢話：「其實我一直好欣賞柏豪，希望遲啲有機會喺音樂上合作，呢樣都係我其中一個心願。」