當年今日
關於我們

【笑到最後】港股跌千點最大風險(高明)

蘋果日報 2018/03/11 16:30

港股高明

港股「單跳」日升日跌時候過去,連升兩日加上美股周五大升440點,但對高明嚟講,都仲係有少少懷疑。
之前曾經講過,今年市況,要冇合理疑點先會再次開展升勢,最先為大市添煩添亂嘅原因係加息,聯儲局主席鮑威爾2月底接連兩次喺參眾兩院發言,一度被市場認為係加息態度強硬要將個市沽咗落嚟,但係沽落某個位跌唔穿,就即係壞消息對向下嘅影響有限,始終加息係芸芸壞消息之中,最唔可怕嘅一件事,因為一定有數得計,如果預測今年加四次,按息口調整估值,又或者一次過下跌掃走大孖展高危一族。美國加息嘅憂慮應已跌定。
最可怕係貿易戰,因為一開戰,就冇得收手,同近年唔一樣,美國針對中國產品徵稅,依家無差別攻擊,最先放風話還拖嘅係歐盟。如果情況同1930年smoot hawley tariff通過一樣,當年通過後美股大跌超過七成,加劇大蕭條,最後以戰爭打開貿易壁壘。不過,特朗普轉頭已經話加拿大同墨西哥可以豁免,最後發展極有可能係只有中國申請唔到豁免。更好彩嘅係,特朗普對新經濟嘅興趣不大,暫時只搞鋼鐵類,冇話過會向入口手機甚至進口APP內任何消費徵收關稅,暫時唔會破壞新經濟增長動力。無論如何,暫時都當貿易戰疑點已釋除。
未解除因素則係港滙,已經跌至接近觸及弱方兌換保證嘅港元滙價7.85,一般都係話沽港元買美元去套息,唔信走資係市場主流。不過,高明對走唔走資冇乜興趣,著眼點反而係市場點反應觸及弱方兌換保證。
因為自2005年聯滙改制以來未試過觸及弱方,第一次發生,市場特別大反應。強如去年市況,兩次增發外滙票據,拆息一抽高,港股都要回調接近1000點,短線肯定會有影響。今年市場敏感到一個冇實權嘅白宮經濟顧問離職,都會令道期跌400點,值得觀望市場嘅反應。
今年另一自訂嘅準則,唔估市、升穿就買返,上星期四升穿20天線,機械式買返,至低限度都有一口好倉,始終今年政治上變化大,自己分析都可能會錯,驚個市會絕塵,惟有先買一口好倉。過往美股隔晚暴升,港股多數都高飛曲墜,惟有祈禱今次會唔一樣吧。
高明
https://www.facebook.com/bigricetea/