【唔嬲喇!】洪天明一家四口闔家歡 聽到上海拖女即落閘
汪琳文頌嫻洪天明周家蔚
周家蔚同老公洪天明、汪琳、陳倩揚、姚瑩瑩、姚樂怡、汪琳、文頌嫻等今日分別攜同子女,喺尖沙嘴出席Peppa音樂劇記者會,對於天明早前被傳喺上海拖女一事,天明即話:「又係講呢啲,唔講喇!」有冇影響感情?家蔚示意冇事,天明亦話:「多謝關心!」
講到兩個囝囝,天明指大仔似佢夠百厭,細仔就似家蔚,雖然有時溫柔,但發脾氣就好巴渣。想唔想追個女?天明話:「不嬲都想,睇幾時實行,其實o依家都啱啱好,但有個女就另一個玩法。」爸爸洪金寶想唔想佢哋生個女?天明笑住表示:「第一個未出世,佢已經咁講,叫我生一打;其實如果再生,我會考慮人工受孕,為生女而生。」
去年4月曾表示兩年前不幸小產嘅汪琳,今日見佢腹大便便,原來佢成功懷孕,汪琳透露預產期係7月尾,又大讚6歲嘅囡囡Kesha為佢懷孕一事保守秘密:「佢幫我保守咗3個月,好乖!」問到呢胎仔定女?汪琳指老公想保持神秘感,而Kesha就話:「細佬同細妹都鍾意。」問到汪琳會唔會繼續追?佢即刻話:「唔好喇!夠喇!我等呢胎等咗6年。」
精選娛聞,喺晒《娛果》
http://fb.com/appledailyent
天明笑住表示:「其實如果再生,我會考慮人工受孕,為生女而生。」
姚瑩瑩、姚樂怡攜同子女,喺尖沙嘴出席Peppa音樂劇記者會。
曾表示不幸小產嘅汪琳,今日見佢腹大便便,原來佢成功懷孕。