自反送中運動展開後，旺角及太子多次成為抗爭戰場，令附近一帶「潮人」商場如旺角中心生意都一落千丈。但旺中時裝店店東的「黃絲」少女嘉盈，不但沒有抱怨逆境導致虧蝕，她更因為在先達廣場的傳媒直播中勇敢發聲撐「五大訴求 缺一不可」，成為了網上紅人，被封為「先達MK妹」。嘉盈坦言高調撐反送中後，旋即被疑似藍絲網上起底及滋擾，小店營業額亦因社會衝突而減少。但她沒有後悔，更反過來利用自己的小店及「MK妹」的人氣，去呼籲更多真香港人加入抗爭。因嘉盈認為做人的原則遠比賺錢重要，「人多、團結同埋唔驚，呢三樣嘢加埋，佢哋（政府）就吹我哋唔脹！」

記者：林穎嵐　　攝影：徐雲庭

年僅21歲的少女嘉盈在網上爆紅，源於今年9月iPhone 11面世後傳媒紛紛到先達廣場採訪。本來已在旺中開時裝店做店東的她，因往年曾在先達上班，剛好iPhone 11面世，有先達店主邀請她幫手看舖「收機」，令她出現在網上直播片段。直播中，她突然堅定講出「五大訴求，缺一不可」及做出手勢，勉勵抗爭者不可放棄，否則便「對唔住死咗嘅義士」，有關影片旋即在網上熱播。

但煩惱隨之而來，因她隨即被網民起底，有人讚賞她，但也有人對她有意見，她卻不以為然，「因為嗰個時間（場運動）個熱潮好似退咗，人嘅憤怒變咗慣性，咁我咪喺鏡頭前面講吓，如果為其他人帶嚟正面嘅影響，我都係開心嘅。」她指片段在網上瘋傳後，大部份朋友都質疑她為何高調表態，「有朋友話我『你以後唔使返大陸啦？』但我嘅回答係『咪唔返囉！』，呢啲鬼地方其實唔去都冇所謂。」

嘉盈透露，她19歲完成中六後便在先達廣場內任職店員，自今年8月起與朋友在旺中以每月兩萬多元租金租下一個100多呎的舖位開設時裝店。6月9日起已參與反送中運動的她，當時仍在先達打工，因工作關係致較難參加集會示威，「嗰陣我好多時都冇得出席，只可以返工睇直播，有時會喺先達睇到喊，會（因為去唔到）有一種內疚感，好難受，但我咩都做唔到。」

直至8月剛好有朋友提議合資開舖，嘉盈即時答允，原因之一便是因為做老闆能有更多自由及時間去撐抗爭，「因為我自己做老闆可以同人哋協調，叫人幫我看檔，我可以瞓晒身落去場運動。」不過其後連串示威衝突、港鐵停駛加上警方鬧市狂放催淚彈，她坦言令店舖由開業初期平均一日有數千元生意，到近月跌至最差曾錄得一日70元營業額，入不敷支，但她從無後悔。

嘉盈直言若自己改為留在舖頭坐鎮，其人氣應有助提升生意額力挽狂瀾，但她最終仍選擇放棄金錢，寧願多些去抗爭，「我覺得（出去抗爭）係must do！唔做良心過意唔去……要缺席我會好內疚。」嘉盈坦言在香港未來與生意之間，她早已選擇前者，「就算我輸同蝕都係輸一、兩年（嘅事），仲有時間重新嚟過。」

不過年僅21歲的嘉盈，受訪一身短裙加跌膊的性感裝扮，再加上亮眼妝容，難免令部份人質疑：「你真係識政治？」但嘉盈笑言自己雖然未必算是精通政治，但自小已留意時事新聞，並關注香港局勢發展。原來她14歲起已有一個嗜好，便是追看立法會會議片段，因她愛看議員間針鋒相對的舌劍唇槍，她並曾經每周追看《城市論壇》及《頭條新聞》，「我好鍾意睇《頭條新聞》，真係好好笑。」

她邊說邊笑模仿曾志豪與吳志森的「太監」與「太后」對話，直言「真係會笑到肚痛」。在爛gag的氛圍下學習政治，是嘉盈與真香港人connect的起點。在對話中，她提到倪匡及著有《活著》的內地作家余華，又提及自己多年前從電台DJ森美的訪問中深明「生活係離唔開政治」。

嘉盈坦承過去不時與朋友到內地消費，但半年前起已漸漸不再北上，正式與內地割席。她甚至連日常生活都隨之改變，由下班放假去睇戲食飯，變成有時間便出去遊行。她憶述6月9日前一晚他與一名原本政治冷感的男性朋友喝酒，「我嗰陣同佢講聽日要去遊行，想邀請佢去，跟住佢就理解唔到，因為佢以往冇參加過。」她笑言，翌日他的朋友抱着好奇心跟她一同參與百萬人大遊行，「嗰日我不停同佢講，呢個街站（嗰位）係邊個邊個呢，嗱，呢個就係長洲覆核王等等。總之有啲比較出名啲嘅政治人物會喺現場我都同佢介紹返，又會講吓《逃犯修訂條例》係乜嘢事之類。」她直言這是她其中一個呼籲朋友加入抗爭的方式。

自從在網上爆紅後，嘉盈笑言自己這段期間利用「MK妹」優勢，透過followers急升的IG賬號大量發佈抗爭文宣，「但最令我驚訝嘅係有超多大陸人喺我IG度send訊息畀我想了解（反送中），佢哋真係想知咩事，會問究竟7.21件事係點嘅，究竟打市民嗰啲係乜嘢人，原來佢哋誤以為打人嗰班鄉黑係示威者，咁我梗係要即刻解釋同澄清返，畀啲證據佢哋睇啦！」

自言不介意被揶揄是「MK妹」的嘉盈，在旺中開設時裝店後，除了不忘外出參與遊行外，亦在舖頭及網上發佈及派發文宣。她的店內有大量抗爭icon「Pepe the Frog」公仔擺設，亦有本報早前推出的特刊《自由之夏》，屬於「黃到金」的黃店，但她亦曾因高調表態而遭藍絲滋擾，甚至被質疑是暴徒，但她不介意：「我做嘅嘢係捍衛緊香港嘅核心價值，如果佢哋覺得咁叫暴徒，咁你叫我暴徒啦。」

她的店裏除了有文宣派發之外，早前亦提供口罩予大眾免費取用，「《蒙面法》（宣佈實施）後好多藥房加咗價，由5毫子加到2蚊，所以我買定啲喺度畀人免費攞。」她直言旺中的舖頭，早已成為她推廣反送中的途徑（橋頭堡），亦期望所有黃絲店主都應該勇於表達立場，不應怕藍絲的打壓，「佢哋就係唔想你表態或者唔想你支持示威者，咁你點可以屈服喺白色恐怖之下？」

她以「國難五金」被多次搜查為例，「（國難五金）開邊度俾人摷邊度，佢哋（政府或警察）就係想我哋驚。如果我哋個個都唔驚，佢就唔會再搜….只要人多、團結同唔驚，三樣嘢加埋，其實佢哋就吹我哋唔脹！」嘉盈堅信只要市民齊心，反送中抗爭運動總有成功的一天。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568