一向口直心快、人稱寶Baby嘅東亞銀行（023）主席李國寶，噚日喺股東會大部份時間都噤若寒蟬，事關自去年底喺發行混合一級資本債嘅股東特別大會，寶哥哥同小股東梁國強互片開火後，佢已經汲取教訓，對於自己嘅天價薪酬，噚日全部交哂畀身兼該行薪酬委員會主席嘅偉易達（303）主席黃子欣解話。
寶哥哥09年嘅酌情花紅達2540萬元，連基本薪酬及認股證，飆升咗72%去到5760萬元。身兼電盈（008）小股東大聯盟召集人嘅東亞小股東梁國強就率先發爛，話東亞07年盈利新高時，寶哥哥花紅只係收1540萬元，舊年盈利復蘇，就一年收番兩年錢。
另一小股東更加呼籲，東亞千祈唔好學歐美銀行啲衰嘢，亂派花紅，又話中國人嘅標準係「好似泥水佬咁，度門檻過得自己過得人」，又直指寶哥哥細佬兼東亞董事李國章做過教育局局長，應該好明白呢個道理，股東隨即鼓掌助慶。
黃子欣就解釋話，高管分紅係根據盈利同埋新加入嘅經營收益作掛鈎，薪酬委員會亦參照國際顧問收集市場資料，審議花紅水平，經董事會通過後先至分派，絕對有機制有操守咁話。

相對寶哥哥，另一李家掌門人嘅薪酬合理好多！長實（001）年報顯示，主席李嘉誠（圖）無加價，只係收緊5000蚊董事袍金一年，單計呢粒數，超人時薪肯定遠低於廿蚊架！
理論上（如無意外、理論上咋!）遲早接收阿爸王國的董事總經理李澤鉅（小超人），全年乜都計晒實收4886萬元，比08年加多左123萬元。但鉅少係長和系一人之下萬人之上嘅Number2，不過大家講乜都無用，最緊要爸爸覺得佢掂，正如佢舊年回應政府資助大學生計劃人工最低只得4000蚊個句「你叻咪有人工加囉！」

大學生要證明自己叻，其中一個方法就係到滙豐呢類大企業。滙豐為咗吸納年齡介乎15至30歲嘅Y世代，呢一群極具潛力嘅客戶，計劃招募最多20位大學生或啱啱畢業嘅大學生，出任Y世代大使，喺今個暑假進行為期3至6個月實習工作，從Y世代角度出發，令獅子行更明白Y世代所想所需。
滙豐香港區個人理財業務主管麥倩華話，家獅子行Y世代客戶約80萬，滲透率達50%，其中25至30歲嘅滲透率高達80%，約20%Y世代客戶持有投資戶口，可見業務增長潛力龐大。
呢班Y世代大使，雖然只係實習性質，但都會有糧出，不過麥倩華就唔肯透露實際金額。

李華華
mailto:[email protected]