關楚耀、狄易達、「火雞姐」丁可欣同街頭歌手羅凱鈴（Judas Law）噚晚喺旺角麥花臣舉行音樂會，同場仲有松岡李那，當佢喺台上表演時，張建聲突然現身上台向松岡獻花。

關楚耀早前為咗拍攝新歌《飢餓遊戲》MV而留長髮，近排回復短髮靚仔look，佢話：「我好鍾意呢個長髮造型，但好多朋友畀訊息我，問我發生咩事，有啲人仲直接問候我，我本身想keep住留長，長到可以fing頭髮嗰啲，所以剪短有啲唔捨得。」

講到好多網民唔鍾意佢長髮look喎，佢笑住話：「其實有好多女仔見到我會尖叫，係調頭走嗰隻，其實MV嘅效果都幾好，有人讚，不過見到真人就調頭走，希望將來有個角色係可以畀我留長髮，我好鍾意呢啲不羈形象。」咁係咪5月開個唱﹖佢表示：「o依家同公司度緊，今年會多啲音樂作品，我都想搞音樂會，但要儲下歌先。」

狄易達表示最近自資做老闆忙做歌，直言唔想成日靠人，問佢係咪好多錢﹖狄易達話：「唔係，我都努力跑數，我預計拎6位數字出嚟做歌，我好欣賞『火雞姐』，之前有首歌好想同佢合唱，仲可以免費做佢dancer。」Judas透露最近已簽經理人公司，出碟有待公司安排，但佢亦會繼續街頭唱歌。

精選娛聞，喺晒《娛果》
http://fb.com/appledailyent