日本組合Morning娘前成員加護亞依，由以前喺Morning娘時已經麻煩多多，但佢4年前嫁咗畀個大佢廿幾年嘅圈外阿叔之後，就更麻煩，佢個圈外人老公上年因為涉嫌放貴利被捕，今年6月又涉嫌向加護施以家暴被警察調查，之後加護公開表示已申請離婚，仲話想重返藝能界。

噚晚加護亞依上咗搞笑紅合Downtown個節目做嘉賓，係佢離婚後首次喺電視上面出現，佢重提自己以往嘅舊事，承認喺Morning娘時期曾未成年吸煙，而且更承認有人搵過佢拍AV，話當時差啲被騙。

加護表示：「4年前有人話請我拍戲，仲同我話電影雖然有裸體鏡頭，但唔使我脫，點知後來先至知根本就係AV片，唔單只要脫，仲有SM鏡頭！」佢話嗰次好危險，差少少就簽咗約做AV女優喎。不過，節目中佢個樣殘爆，要重返藝能界相信要先保養番好。