第一場五班泥地1800米，徐廐「皇龍大師」前段落腳慢，末段經常姍姍來遲，大前仗配莫雷拉跑同程，轉彎時仍落後六馬位，直路上逢馬過馬，最終只輸兩個半馬位跑第二，走勢勁到無倫。上仗改配柏寶，出閘後即打兩鞭省起前速，早段不太落後，轉彎前又再不斷打鞭，直路初段先發制人，結果直奔終點贏馬，鞍上人發揮一絕。查此駒上季試過在四班打叠贏，今次繼續由柏寶執韁，騎練合作正處蜜月期，即使轉跑泥地，在五班要贏多W絕對唔難。
「帶利來」最近兩次跑泥地都上名，證明跑泥地好過草地，大前仗跑同程排13檔，早段用力搶前，兼且沿途望空跑，結果只落後「皇龍大師」四分一馬位得第三，今次排五檔更易發揮，上周二朝已交田泰安過檔試三段，末段扣實都跳出23秒1，勇態畢露有勝機。「歡欣滿載」一再於黃皓楠胯下跑得好，改配韋達理應有更理想發揮，孭重12磅都要睇實。「和諧氣氛」上仗泥地1650米首次上名，三歲馬進步顯著，五班遲早留唔住。