移居澳洲墨爾本多年嘅前藝人杜平，專誠由澳洲返港出席今日喺西灣河電影資料館舉行嘅座談會，重溫以前七十年代主演粵語片《歡樂人生》，一班好朋友胡楓、森森、契妹翁虹都專登來支持。

杜平話喺座談會分享入行經過，亦都好開心佢演出嘅粵語片被認同，未來會否再拍戲？杜平話：「0依家少啲，因為年紀大咗，而且0依家同以前嘅演繹係兩回事，0依家節奏快好多，以前時間可以長啲。」

杜平謂今次回港會逗留至下月初先至返澳洲，主要有幾個項目要做，同唔同媒體合作回顧粵語片時代。佢每次回港會和老友相聚，可惜契仔溫兆倫就未能趕及回來，杜平話：「知道佢最近做導演，準備開戲，略略提過搵我幫手，但我都唔知係乜戲。」

翁虹專誠喺台灣返港撐場，認為上一代的藝人對她影響很深，係好好嘅榜樣，無論專業、修養、道德、年輕一輩亦忽視，要提醒番新一代重視一下，傳承這個態度。翁虹仲話只要杜平一吹雞開戲，自己一定支持，而她本身亦喺內地開工。佢仲話睇番以前啲粵語片感觸良多，尤其喺片中見到肥姐沈澱霞，翁虹話早前去咗加拿大，有到肥姐墳前拜祭。