大家係咪好懷念經常笑料百出嘅民建聯前立法會議員鍾樹根呢？查實Tree根精神無處不在，連選委會選舉都有Tree根二號，仲要係高教界嘅，相信佢都老懷安慰，因為「後人有繼」嘛！

Tree根舊年區選宣傳單張將自己個名Chris串錯做Chirs，俾網民笑到𠵱家。之不過呢，人類總是重複同樣的錯誤，有網民發現，參選高教界選委嘅團隊「香港重建」喺簡介串錯字，將職業大學教授寫成「UNIVERISTY PROFESSOR」，University掉轉咗「s」「i」，CUHK Secrets fb專頁形容係高等教育界嘅低等錯誤，同Chirs CHUNG異曲同工，唔少網民出言諷刺「果然係人才」，又問佢哋個學位係咪買番嚟。
呢個香港重建團隊好猛料㗎，由4個經濟學者組成，包括讚過梁振英過去4年好努力嘅港大經濟金融學院講座教授王于漸、話佔中令香港損失好多個億嘅科大經濟學系教授雷鼎鳴。

半日認錯　讚網民細心

不過佢哋都算反應快，發酵唔夠半日已經出po認有手民之誤致歉，仲讚網民細心㖭，「希望您繼續利用您的專業知識和細心，今個星期日選出真正為香港、為高教界的團隊，重建香港，重建務實、健康的高等教育界！」

李八方
mailto:[email protected]