行街鄭過年前自上海打電話落嚟拜個早年，恭喜一輪之後，佢話一位表妹睇咗本欄一月二十三日講《中國賓架》，講到渣打銀行調派咗人力資源部頭頭曾璟璇做中國區總裁，甚為羨慕，皆因表妹又係銀行人事部經理，成日想轉去前線，在上海闖一番天下。佢表妹嘅波士勸佢唔好野心太大，人力資源部屬後勤部門，全世界嘅大銀行極少後勤人員升上最高層例子，鄭海泉由經濟研究員升做大班，算係例外，但經濟研究員經常面向世界傳媒，曝光多，點似人力資源部成日在幕後埋首工作，出面冇人識呀？

表妹立即語塞，後來見到本欄講曾璟璇之例子，開心到極，覺得由人力資源部轉調前線，未必冇希望，曾小姐就係佢嘅偶像。左丁山聽完行街鄭講表妹，忍唔住話畀佢聽：「一月二十三日專欄刊出之後，幾位賓架老友、議員打電話畀我，鬧我有眼不識泰山，唔知道曾小姐嘅阿哥就係曾蔭權、曾蔭培，住得背。我點會唔知吖，不過畫公仔費事畫出腸，故意不提啫。你位表妹如果係大名人嘅表妹，野心不妨大些少，否則就最好做工勤力啲！」
已在渣打退休嘅賓架Ｇ講過畀左丁山聽，曾小姐在渣打服務多年，屬首席華人代表一類。好senior，好勤力工作，有男人強悍之風，去到上海代替另一位人事部出身嘅MartinFish，實會有過之而無不及！
去到上海，全國精英集中之地，有冇料到，好快就知，總之英雄莫問出處，無論黃貓黑貓，捉到老鼠（做到大deal也）就係好貓！（按，據岑逸飛考證，白貓黑貓，實黃貓黑貓之誤，鄧小平引用劉伯承（兩人皆四川人）之四川土話，因而傳頌一時。）