王維基嘅香港電視不獲香港政府發牌事件，梁振英嘅一男子政府對於「維基死因」，一句機密就等如已解釋，此舉動引嚟好多市民嘅不滿，亦都有唔少圈中人談論。

本地著名資深電視人，曾經係無綫任職製作總監，更有「橋王」之稱嘅劉天賜(賜官)，一直都好支持王維基做一場電視革命，話晒賜官都係電視界嘅革命先驅、佳視六君子成員之一，早於去年底，已表態支持王維基起革命。賜官去年接受本報訪問，謂：「無綫同亞視已經做到呢個行業殘咗，係時候要洗一洗牌。無綫每年台慶先整一、兩套好嘢出嚟，好似過時過節就整一、兩餐好嘢你食，平時就鹹魚青菜啦。」更認真地謂：「0依家無綫幕後嚟嚟去去都係梁家樹、曾勵珍呢啲老鬼，佢哋始終會老會死0架嘛。」

無奈，即使有民意支持做基礎，香港電視仍「死」得不明不白。今日
賜官就喺facebook寫咗一篇名為「撕裂香港」嘅文章，當中講到「香港電視不獲發牌一事，必定是『連續劇』」、「內情愈神秘愈耐人尋味！鮮見特區政府突然『硬』將起來（面對菲人又軟）。今按殖民地『惡法』提行政會須保密。實在有何機密可言？」又指「如果當事人申請向法院施法覆核，而又受理，則可能令特區局面更進一步撕裂。因為法官們未必與特首及行政會成員同一意見。」

如今王維基已提出司法覆核，咁事件會發展成點？賜官於文中寫道:「當事人申請向法院施法覆核，而又受理，則可能令特區局面更進一步撕裂。因為法官們未必與特首及行政會成員同一意見。這便是三權分立之優點，卻是香港官僚失民心的一次大劫！梁振英及促成此決定的人士，又不肯光明磊落公開理由，乃是香港亂局爆發點火人。因為『真正普選』『佔中』等事，不及此次『機密籍口』令市民更有欲望推梁下台，而在行會中推波助瀾者，亦令梁老板『死』不知原因。王維基，死得不明不白還有人陪你。」好陰謀論喎，0依家大家都估緊當日係邊個政府官員「跣」佢入局，唔通呢位已離職高官，最終目的係想拉一男子落馬？

之後賜官再喺facebook到再話：「不發牌香港電視一案，通識科老師出此題討論，下次考試該有此題。記者追查行會成員，哪位反對，哪位促成？公諸於世！」咁真係要等「維基」解密？

另外連一班電影人都對不發牌事件有所行動，電影導演張堅庭喺facebook到話：「王維基的電視風雲，導演會也看不過眼，有所行動。」因為導演會會長爾冬陞同香港電影工作者總會會長吳思遠喺較早之前話喺聽日會發聲明，支持香港電視。

演藝圈眾志成城，一場由電視革命引發的抗爭，關你事，亦關我事。香港人，要有香港人嘅電視!星期日政總見!