【爭住愛國】唯唯為妻女微博公開搲撈 鍾鎮濤愛國愛到送女去台灣升學

蘋果日報 2017/02/21 00:01

愛國溫兆倫王祖藍鍾鎮濤熊黛林梁烈唯

7警於佔領期間,因襲擊曾健超而被判囚兩年,估唔到做咗百億人妻嘅熊黛林(Lynn)都好關心呢件事,喺微博見到向太陳嵐留言力撐7警嘅時候,佢都留言質疑:「只有壞人打警察,警察不能打壞人?!什麼世道?!」有網民讚佢係真女神,覺得佢嘅表現好愛國。(新聞連結: http://bit.ly/2kDDbFr )咁除咗Lynn愛國情深,來好多藝人都不時喺網上發表愛國宣言。
鍾鎮濤
阿B前年喺電視上睇到中共大閱兵,佢喺微博寫道:「在電視機前看閱兵,國歌唱一半就哽咽了,熱淚盈眶唱不下去~ 祖國萬歲!」實在令人動容。之但係,阿B就冇送囡囡鍾嘉晴返祖國讀書,反而送咗佢去台灣讀喎,呢點又真係唔多理解喇!(新聞連結: http://bit.ly/2kDQHsH )
梁烈唯
唯唯喺香港就做咗負皮王,但係為咗老婆同囡囡,去年就係微博留言連出兩個post搲撈!話成個8月好得閒,叫人幫手介紹job俾佢。咁佢話晒曾經喺微博貼過「祖國萬歲」嘅相,即刻得到「共青團中央」嘅垂青,跟手就接咗唔少大陸騷喇!(新聞連結: http://bit.ly/2kPQ3nf )
王祖藍
喺大陸開咗工作室嘅祖藍,不時同老婆李亞藍孖住返大陸賺人仔,真係賺到盆滿砵滿呀,無論國慶、回歸、南海仲裁,佢哋都會好自發性喺網上留言,感謝同支持祖國。
溫兆倫
溫兆倫自從返咗大陸發展後,就由演員變咗「愛國英雄」,做咗「愛國溫」,14年,佢接受大陸《環球時報》訪問時,就公開批評杜汶澤,話其實可以寬恕佢一次,畀啲正能量佢,不過如果佢「死性不改」的話,就要受到「一定的懲罰」咁話喎。(新聞連結: http://bit.ly/2kPSExm )