有市民投訴,大埔大元邨的公用洗手間管理水準差劣,清潔及衞生情況不理想,內裏設施失修多時,令使用者諸多不便。
李先生指出,大元邨的街市、停車場及商場內的公用的洗手間衞生環境欠佳。「呢度居民嘅生活必需品,包括餸菜到日用品,主要都喺邨內街市同商場購買,好多時都去公用廁所,但發覺廁所裏面好污糟,清潔水平好差。」
他最不滿是廁格內的腳踏水掣損毀多時,卻一直無人修理,邨民如廁後未能放水沖廁,衞生情況惡劣得令人難以忍受。「最離譜係簡單到連廁格門鎖爛咗都無人整,根本閂唔到門,去緊廁所成日有人推門入嚟,好尷尬!」