今屆港姐，香港市民雖然冇得選，但投入同肉緊程度郤係百分百。連日「萬箭穿心」嘅冠軍雷莊𠒇，以一己之力，連日喺Ig開live、又留千字文(全英文)，指面對排山倒海嘅負評，自己唔會感到畏懼，又話自己唔屬於沉默嘅類型，仲話自己係一個有野心嘅人，將來履行完港姐職責後，就會去荷里活發展。

其實綜觀近三屆港姐冠軍，15年10A港姐麥明詩最初俾人話唔夠貼地，被封為「離地港姐」、而馮盈盈當選後，就俾人揭番佢喺facebook曾經連環爆粗，有「粗口港姐」稱號。到今屆嘅雷莊𠒇，就更加多花名「火雞姐」、「癲姐」、「女版細哨」……(不能盡錄)

馮盈盈繼日前喺facebook，貼咗同Juliette一白一黑嘅合照後，噚晚喺Ig，佢又上載咗同Juliette、麥明詩（Louisa）嘅照片，三屆港姐冠軍同場，麥同馮十足左右護法咁。馮盈盈仲寫：「三代同堂，很難得的機會，與師姐Louisa和師妹Juliette坐下來聊天談談港姐的點滴，與Juliette交談過後，就會發覺她是個很堅強和有自信的女孩，從她身上也好像看到一年前的自己，沒有受過風雨，就不會懂得雨後放晴之美，沒有經過低谷就不會欣賞高山沿路風景，回望當初，感恩當日一切經歷，壓力是成長最大動力，願我們師姐妹往後繼續互相扶持一起成長！」相信盈盈係想安慰一下呢位出爐港姐師妹。可惜佢嘅一片苦心，繼續換嚟網民對雷莊𠒇嘅狙擊，更喺有比較之下，有網民話雷莊𠒇俾兩位師姐拋離9條街。

Hashtag仲有感而發話「港姐真係唔易做」、「幾多不為人知的辛酸」、「惟有努力做好自己」、「希望大家會知道我們的用心和下的苦功」、「就是最好的回憶」、「共勉之」。