新世界發展（017）舊年成功私有化新世界中國後，近排就郁手私有化埋新百貨（825），動作多多，自然連股價都有郁動空間，近期仲突破10蚊關口，由年初至今升近3成。

股價猛升，除咗長年揸住新世界嘅小股東開心之外，相信一班新世界員工就最開心嘞！事關以往新世界股價係6、7蚊徘徊，家陣爆上10蚊，一班得到唔少share options嘅員工，終於有機會行使購股權，支持下公司。

單係今個月初至今，新世界就因為員工行使購股權而需發行93.4萬股，部份行使價最低係7.2元同7.54元，按新世界今日收報10.64元，賬面利潤甚豐，有另類花紅落袋喇。而另外有部份行使價係接近10蚊，似乎幾睇好公司前景，新世界第三代接班人鄭志剛似乎做到嘢。

掌握財經生活資訊，即Like「蘋果ATM」fb專頁啦！
http://fb.com/appledailyatm