1月1日元旦沙田賽馬跑11場，戲碼唔曳，至少有場1400米國際三級賽華商會挑戰盃上演，新一年新開始，相信各路人馬都好希望打響2018年頭炮。

睇番過去幾年元旦賽日成績，原來資深練馬師大摩成績特佳，最新五年均有頭馬交出，更於上年及2014年元旦日中三元；近五年此賽日夾埋贏出九場頭馬，認真威水，看來他十分熱衷響新年攞頭彩。

睇番2018年1月1日報名表，大摩在當日其中七場賽事有正選馬，包括華商會盃「喜蓮獎星」及「飛來猛」雙龍出海。

「喜蓮獎星」貴為級際賽常客，上仗香港一哩錦標跑第三，由廐侶「美麗傳承」奪標，今次「喜蓮獎星」降呢出爭三級賽，對手易應付得多，無疑負133磅上陣不輕鬆，但此馬其實曾負133磅擊敗「壯思飛」贏馬，負重能力甚強，今仗未許低估。