日本TBS電視台劇集《中學聖日記》昨日播出大結局，由人氣女星有村架純拍住19歲新人岡田健史上演師生戀，呢套劇一直被拿來與松嶋菜菜子夥拍瀧澤秀明嘅經典劇《魔女的條件》相比，無奈收視相差一大截，而最後一集就收9.6%，比上集嘅7.3%躍升2.3%收視，未能突破雙位數，但已經係開播以來最好成績。

雖然《中學聖日記》成績一般，但Uru為劇集唱出嘅主題曲《prolog》卻大受歡迎，高踞當地各大流行榜及下載榜，該劇更帶挈岡田健史火速上位。

岡田健史原名叫水上恒司，曾就讀創成館高校，屬校內棒球部，甫入行即備受力捧，其實佢所屬事務所擅長捧青春女星，近10年分別有堀北真希、黑木美沙及桐谷美玲，可惜三人於搏殺時期毅然嫁人，事務所見旗下小花正青黃不接，惟有集中火力催谷岡田健史，而趁《中學聖日記》播到最後一集，岡田健史即獲公司開設Instagram帳號，截至今早已有27萬人追隨，其首個po短短數小時已破10萬個like。

精選娛聞，喺晒《娛果》
http://fb.com/appledailyent