小妹3月尾度去泰國，好在係去布吉島唔係曼谷，仲專登買部防水相機到時玩浮潛，但坊間防水機太厚，女仔人家攞住好鬼肉酸，終於有部全球最薄嘅防水相機出籠，就係1,060萬像素嘅SonyCyber-shotTX5。
噚日終於見到TX5真身，厚度只有16.7毫米，放喺baguette手袋仔都得，可以喺水深3米內操作，啱晒浮潛。小妹試過伸手入魚缸影條魚仔，效果幾好，最正係個touchscreen點觸式屏幕喺水底都可以用。水底比較暗，但佢有ExmorRCmos影像感應器，用兩倍感光度一次連拍6張相，然後即時重叠處理，刪減唔靚嘅影像，就會得出比較光嘅相片。

米半高跌唔壞

潛水最開心見到成群魚仔，TX5有智能iSweep「一掃全景」功能，係之前型號嘅進階版，對住魚群掃一掃，部機就可以將影像連成為全景相片，幾大群魚都影晒。同事阿清都想試吓部機，因為佢諗住去北歐，而TX5仲係可以抵禦零下10℃低溫，唔使吓吓將部機放入褸取暖。
女仔鍾意自拍，部機嘅自拍功能，係等鏡頭嘅人面都對晒焦先至會倒數兩秒自動㩒機。一定要提嘅，就係部機可以承受1.5米高度跌下嘅衝力，小妹親自試過（將部新機掟落地，原來好爽），以後同男友鬧交掟相機都唔肉痛。部機唔算平要$2,990，即日起喺SonyStyle專門店接受預訂。

電郵：mailto:[email protected]