特區政府近排全力展開洗白工程，除咗由Popo帶頭成日想用謊言來澄清事實，八方仲發現官方有其他小動作，例如fb出現一個叫「添馬台」（Tamar Talk）嘅專頁，扮晒電視台報新聞格局，第一個po就係幫Popo放料，話會嚴正追究破壞社會嘅暴徒，仲引述PPRB阿頭郭嘉銓講嘅廢噏製圖，同起名叫「有理有句」。然後噚日再出帖，講最新失業率同紓困措施，但啲帖文出咗幾個鐘，結果一個like都呃唔到。

新聞處聲稱不涉額外資源

其實冇人理好正常，因為呢個新專頁喺12號建立，過咗五日但讚好數都只得200幾個，實在叫人情何以堪？如果係用公帑，咁仲唔係浪費資源？八方問過新聞處，佢哋就認係透過調撥內部資源，包括用新聞處現有人手管呢個新專頁，原因係發覺近月有唔少假消息同謠言喺網上流傳，所以想喺新專用平台集中同快速提供準確資訊，澄清謠言，以正視聽，仲話係配合政府恢復秩序，重新出發嘅工作，唔涉及額外資源喎。但八方就好想知，如果個專頁冇人理，咁所謂澄清公眾又點收到呢？而呢班人手本身唔係冇嘢做，呢啲唔係資源又係咩呢？「添馬台」不如自己先澄清吓啦！