咁啱得咁橋，郭富城、熊黛林同苟芸慧三人，噚晚同今日都分別現身，城城噚晚現身啟德郵輪碼頭，被問到係咪送鑽戒向新任城嫂葉熙祺求婚、同埋早前葉熙祺「攻城」一事，城城都係一貫封嘴：「緣份嚟擋都擋唔住，目前冇拍拖，緣份到一定同大家分享。」

城城如魚得水，但舊愛Lynn熊黛林喺微博取消對佢嘅「關注」，城城話： 「冇睇，冇乜所謂，最重要開心！」 問城城係咪同葉熙祺拍拖？城城話： 「朋友，佢係我朋友。」至於點樣識？城城就話因為大家都有commonfriend喎。 但一問到葉小姐話收男朋友戒指，佢就話：「我唔方便評論，對方已發聲明，話係不實報道。」

但係，新任城嫂葉熙祺日前接受專訪時，唔止直認收過城城送嘅禮物: 「我唔止收過一份，仲有好多份，但冇幾百萬咁貴重，總之唔係平價嘢。」 當聽到城城同Lynn拍拖7年、只送過一部MiniCooper，葉熙祺即偷笑仲話：「咁又真係孤寒咗喎。」

訪問中，葉熙祺仲發表愛的宣言，直認:「我好冧佢!」又話:「佢對我好有心，我哋係傾得到心事嘅好朋友，唯一佢唔夠溫柔囉！」問佢係咪嫌城城「粗暴」？葉熙祺話:「少少啦!」吓？

另一邊廂，前任城嫂Lynn今晚喺中環出席連卡佛活動，見佢明顯消瘦，但佢就話自己肥咗4、5磅，又話唔得閒睇報道：「唔得閒睇無謂嘢。」

有指葉熙祺承認同城城拍拖半年，早前更於微博暗寸32歲Lynn為「前輩」，而且似乎與Lynn同城城喺4月分手「時間交叠」——換言之城城係同一時間………問Lynn係咪出現第三者？佢低頭苦笑說： 「要問番當時人，有好多原因，再講都無謂，改變唔到啲乜嘢。」 對葉熙祺不停喺微博挑機，Lynn表示唔想對號入座。咁係咪取消關注城城？佢話：「唔答喇。」咁接唔接受到一腳踏兩船？Lynn再話： 「唔鍾意同人爭，係我會退出！」