劉小麗搶閘報名九西補選，公屋區將是復仇戰的重點陣地，上次3.11補選，民建聯鄭泳舜於啟德新公屋啟晴邨重挫民主派姚松炎，建制派得票率高達65%，但民主派在紅區即使落後「成條街」，也不等於棄守，劉小麗指相比土瓜灣，「啟晴邨唔係好紅」，指建制派雖有蛇齋餅糭，但民主派可靠地區議題，與冷漠佔多的居民建立關係，「唔能夠放棄每一個戰場」。

記者 姚國雄

根據年初的3.11九龍西補選，民建聯在啟晴邨的得票率高達65%，民主派34%，此區為建制、泛民得票率最懸殊。劉小麗坦言沒有反敗為勝的把握，惟有「盡做」爭取翻盤，冀「起碼有四成（得票率）」：「我覺得啟晴邨唔係好紅，佢哋其實想要一個好親民、好關心佢哋處境嘅議員。」

一般人眼中，新公屋多住新移民，政治上既紅且左，劉小麗說上周在邨內爭取提名，反應不太差，有人接單張、有人給提名、有人向她點頭示好。住在啟晴邨旁邊、同屬紅區的德朗邨的魏女士路過時便提名給劉小麗，稱很抗拒建制派：「乜嘢都畀人限制住，你鍾意咩？讀咁耐書唔係為咁樣。」她指啟晴、德朗兩邨「九成都係大陸（人住），（選舉時）總有啲人上門、借頭借路派吓嘢，自己知咩事，我唔收嘅，無需要，要嚟做乜？」

劉小麗認為，當建制派以天文數字的資源、盡用蛇齋餅糭籠絡人心，缺乏銀彈的民主派便要用議題與居民建立關係，才有望突圍：「有啲居民同我講，呢區啲人收好多蛇齋餅糭，例如剛剛過去嘅中秋，居民真係收嘢收到怕。呢啲地方係要同居民建立更緊密嘅關係，等佢哋認識我哋，先有個支持度喺度。」

劉續指，以往到這些紅區談沙中線、談土地供應，反應不比其他區差：「我哋都未開完個（街）站，有幾個街坊已經埋嚟話要收回粉嶺高球場；沙中線都係咁，我哋未開完站，已經嚟簽名（聯署要求徹查）。」但殘酷現實是幾年前，啟晴邨爆鉛水醜聞，民主派領軍，結果在選舉失敗收場，是否代表紅區居民「唔抵幫」？劉小麗說：「我哋試過有失敗經驗，但不代表每一次都係失敗...而家係民主派逆境，唔能夠輕易放棄每個戰場。」

問及是否意味上次敗陣的姚松炎忽略了這區居民的需要？劉小麗說難以評論：「我諗上次民主派喺初選完咗之後，姚生唔係太多時間，所以佢無可能做盡每一區，佢有佢自己策略。」而截至上月中，記者在區內尚未見到建制及民主兩邊陣營掛出宣傳陳凱欣及劉小麗的橫額。

立會補選新聞，《蘋果》一網睇晒
http://bit.ly/appledaily1125