今次沙田日馬（7月1日）是季內倒數第五戰，編有三泥七草，草地用利跟前跑法的B跑道舉行，三場泥地都跑一哩，近日天氣炎熱，預期場地狀況正常，後上馬有得追。

總觀今次形勢，大部份場合都有實力重心馬，選擇範圍可收窄。潘頓跟莫雷拉繼續對決，大家都手握重兵，必有一番激烈爭鬥。

第六場四班草地1400米：「智力寶」蔡約翰今季PPG，做足工夫才派遣上陣，期間共試七次大閘，皆因起步好論盡，經常會慢閘，有缺點就要改善，莫雷拉高度重視，最近五次都親自主試，埋門6月12日一課大閘，起步敏捷，走勢有前有後勝出。今仗初出即報跑1400米，有一定難度，但信賴蔡約翰，絕不會貿然作此安排，查血統，跟「天意」、「世澤之星」及「魅力知友」同系，盡是1400米能手，那就放心捧場。

「好客本色」季內未建功，同程曾負於「豈等閒」，如今落四班，即由潘頓接手打理，操足狀態回勇，拍跳勁力貫注。睇操練部署，今仗一定係出擊目標。

「一舖成名」跑了六仗未有成績，然狀態已循序冒升，今次配備有轉變，埋門試大閘有追勢，落四班對手不同，有權推翻大局。

「清新動力」前仗能力迫「智愛」，上仗排外檔，形勢不利蝕唔起，落敗不可作準，其實都追得唔錯。復課維持正常操練，拍跳有追勁，今次抽排三檔，換何澤堯執韁，搏馬手風更順，可跟任何對手週旋。此外，「佳運來」落班跑番首本路程，用潘明輝減磅可兼顧。