莎蓮娜威廉絲同禾絲妮雅琪向來係網壇好姊妹，估唔到連全裸拍雜誌封面照都孖住上？呢邊廂禾琪幫《ESPN》「Body Issue」拍全裸照展現體態美，嗰邊廂懷有7個月身孕嘅細威同樣全裸登上《Vanity Fair》封面，並由著名女攝影師Annie Leibovitz操刀，網民紛紛讚好呢張藝術感十足嘅照片，更將佢同1991年名模狄美摩亞（Demi Moore）嘅大肚封面照相提並論！

細威喺專訪中娓娓道來自己同Reddit創辦人奧漢尼恩嘅愛情故事，包括2015年5月奧漢尼恩刻意坐喺細威隔籬枱造就酒店池畔初次邂逅，今年一月出戰澳網期間發現自己意外懷孕，花咗足足6支驗孕棒求證等有趣故事。對於最近被美國名宿麥根萊（John McEnroe）質疑轉戰男子巡迴賽只會排700位，細威喺專訪中被問及是否認為自己係當代最佳網球手，亦巧合作出最佳反擊：「如果我係男士，呢個唔會係問題。」