有線上星期宣佈告急，有傳母公司九倉會將資源全數用嚟發展奇妙電視，改為挑戰免費電視戰場。

話咁快，奇妙電視今日就現身香港國際影視展公佈大計喇，奇妙電視粵語頻道(77台) 將會喺5月14日晚上啟播。

吳日言、Coffee林芊妤、梁佩瑚、歐錦棠等人今日都有上台介紹佢哋主持嘅綜藝節目，其中歐錦棠主持嘅《無『恐』不入》就好有噱頭，會搵啲各式各樣嘅驚嚇事物挑戰。

呢頭講完，嗰頭工作人員就推咗一盆蟲出嚟挑選嘉賓底線，吳日言同Coffee見到即刻臉色一轉，Coffee仲話：「唔好呀唔好呀，我咩都可以玩，但呢啲就唔得囉。」反而歐倩怡就好食得，咩都唔驚，食完一條又一條。

之後到Dear Jane嘅Tim(黃天翱)、連詩雅、鄭融、吳嘉龍宣傳愛情系列《100天best before》，演分手系列嘅阿Tim，喺台上話：「分手都冇話唔好，唔分手點搵再好。」至於演閃婚系列嘅吳嘉龍，就話自己都有諗過閃婚，但之前兩個女友都俾佢嚇怕咗。

外購劇方面，奇妙電視就宣佈咗會播幾套韓劇，包括《大力女子都捧順》、《舉重妖精金福珠》、《我的金雨》同申敏兒嘅《明天和你》。