當年今日
關於我們

【獨家】曾傳中風 神隱逾十年 65歲顧修全偕女友人睇地產行情

蘋果日報 2017/03/09 00:02

中間分界顧修全心理學

【新增內容】有人話:「(髮型)中間分界,心理變態」,無法求證唔知堅定流,但肯定呢個look係香港著名心理學家顧修全博士嘅「標誌」之一。喺上世紀90年代,顧博士經常亮相電視節目或印刷媒體,為唔同藝員或題目進行心理分析,不過,佢近10幾年嘅曝光率明顯地低咗好多。
雖然顧博士已經唔再活躍於幕前,但係佢出街仍然都好有「收視」,前晚大10點幾,《蘋果》撞見佢現身銅鑼灣百德新街,同行仲有一名已經有啲年紀嘅女士,顧博士前晚儘管冇擸頭,但約65歲嘅佢仍然梳住個招牌all back頭,頭髮仲要唔覺有白色,見佢全程用右手輕輕搭住同行女子膊頭。雖然當時有少少雨粉,但都冇阻兩人喺銅鑼灣街頭漫步嘅心情。
兩人邊行邊傾,睇落係女方講得比較多,但顧博士都有搭兩句嘴,見佢哋講到興起,嗰位女士講到手舞足蹈咁,好投入吓,似係提醒緊顧博士一啲嘢,所以見顧博士不時點吓頭回應。佢哋行咗800米左右,差唔多到顧博士屋企樓下,其間佢哋經過一間地產舖,見佢哋都停一停、睇一睇,唔知係咪關心樓巿咁,但好快就走咗。
去到顧博士屋企樓下,同行女士冇跟住上樓,佢送咗顧博士入大門後,輕輕拍咗顧博士手臂兩下就轉身離開。
據知,住喺附近嘅街坊聽聞,顧博士早前曾經中風,而且病情唔輕,需要坐輪椅出入,有數名工人幫手照顧佢,推輪椅幫顧博士出入,但近日見番顧博士,已經神速地康復,可以自己行得走得,不時現身銅鑼街糖街一帶買嘢,獨自都冇問題,惟眼神有少少呆滯,但相信顧博士已經康復,形象打扮同病之前差唔多。

《蘋果》第十二屆金話梅電影選舉(Golden Plum)又嚟喇!由今日起,請在以下網址( http://campaign.appledaily.com/goldenplum2017 )投票,選出心目中的爛片之霸,截止日期係4月6日,賽果將於香港電影金像獎舉行前夕(4月8日)揭曉。