【棟析先機】用到牌仔減磅！「赤水神駒」有運行（陳華棟）
棟析先機陳華棟赤水神駒
「衰家食尾糊」呢五個字，響2019年尾同豬年年尾嘅馬圈同時發生咗，世事真係何其巧合！
今季一直贏唔到嘅希威森，就響2019年最後一場賽事憑「興爾」贏馬開齋；今季表現失色嘅容天鵬，就憑「手到回來」拎到豬年最後一Win！
食咗豬年尾糊後，踏入鼠年第一場賽事，回勇嘅容天鵬再接再厲，多得大熱門「怡昌飛駒」直路一度受困，令旗下嘅「東龍陣」打開勝利之門，由年尾贏到年頭，睇嚟容天鵬啲馬似係回勇，嚟緊日子都要留意番呢個倉口先得啦！
第二場五班1650米，「安定繁盛」今季轉跑五班演出已經穩定得多，但跑千二同千四米，一係追唔切，一係太均速，結論就係跑上述路程都似乎唔多啱腳法，所以今次進一步增程跑一哩就合腳法得多，莫雷拉繼續壓陣又有一檔之助，贏得啦！
第三場四班1200米，「赤水神駒」季初決心減分等落班，前仗卒之轉爭四班以為會即刻出擊。但阿棟睇番近兩場響四班嘅走勢，只可以用「寓賽於操」嚟形容，但今勻用番十磅仔陳嘉熙去騎，淨係要佢放，唔使咁多技術就無問題，捧得過啊！
第六場三班1650米，「狂舞派」一向跑開谷中一哩，上場無端端轉去跑田草千八米，不利條件集一身，但只係響最後百多米力弱都仲有第五，算唔錯啦！
今次回師擅長嘅谷中一哩作戰，仲要棄用蔡明紹而扳到莫雷拉壓陣，鬥志十足，補中機會相當大。